Í fyrsta þætti Úti siglum við á kajak um Langasjó með leikkonunum Sögu Garðarsdóttur og Steineyju Skúladóttur ásamt fríðu föruneyti. Slegið var upp tjöldum í einni af eyjum Langasjávar, sem einmitt hlaut nafnið Steiney eftir þessa för. Við förum einnig með nokkrum fjölskyldum í tveggja daga gönguferð um Kerlingarfjöll.
Páskaþáttur Úti segir frá magnaðri ferð Guðna Th. Jóhannessonar, forseta Íslands, og föruneytis á hæstu tinda landsins síðastliðið sumar. Hópurinn gisti í tjöldum uppi í Öræfajökulsöskjunni, þar sem nú hefur myndast djúp sigdæld vegna óvæntra jarðhræringa í þessari megineldstöð sem ekki hefur bært á sér í aldir. Gengið var á hæsta tind Íslands í miðnætursól og enn fremur á öllu fáfarnari tind, Vestari Hnapp.
Í þriðja þætti sláumst við í för með Brynhildi Guðjónsdóttur leikkonu og Maríu Ögn Guðmundsdóttur hjólreiðakonu og förum á fjallahjólum af Pokahrygg, meðfram Laufafelli, að Álftavatni og eftir Laugavegi í Hvannagil. Þetta er glæsileg hjólaleið um Friðland að Fjallabaki. Í síðari hluta þáttarins förum við með Helga Seljan og Ísgerði Gunnardóttur í klifurferð í Öræfasveit þar sem þau reyna fyrir sér í kletta- og ísklifri. Ævintýrið reyndi vel á og ekki komust allir alveg óskaddaðir frá þessum viðureignum.
Í fjórða þætti er farið á fjallaskíðum á Ými, hæsta tind Tindfjallajökuls, með Andra Snæ Magnasyni rithöfundi sem sýnir á sér nýja hlið sem hraðafíkill, bæði á skíðum og fjallahjóli. Við komum við í Landmannalaugum með Ferðafélagi barnanna og förum loks á hlaupaskóm upp um fjöll og firnindi í Vestmannaeyjum með Bjarna Benediktssyni fjármálaráðherra og Elísabetu Margeirsdóttur hlaupakonu. Svokölluð sjötindaleið var farin með viðkomu á Blátindi, sem er ekki fyrir lofthrædda.
Í fimmta þætti fylgjum við eftir fjórum konum sem spreyta sig á hinni vinsælu og krefjandi Landvættaáskorun, sem rétt rúmlega tvö hundruð Íslendingar hafa lokið. Þetta er tilfinningaþrungin viðureign kvenna sem í upphafi þjálfunartímabilsins voru sumar að stíga í fyrsta skipti á gönguskíði og reima á sig hlaupaskó.
Hér fara þau Róbert og Brynhildur með leikstjórann Baltasar Kormák í alvöru fjallaklifur í vetraraðstæðum á Kirkjufell í Grundarfirði, en Baltasar hefur dreymt fjallið ótal sinnum síðan í barnæsku. Einnig fara þau með samfélagsmiðlastjörnum í hrollkalt sjóbað í Nauthólsvík.