Fjallað um fyrstu tilraunir Íslendinga til stofnunar flugfélags árið 1919 og næst árið 1928 og þá draumsýn upphafsmanna að gera flugið að raunhæfum samgöngumáta. Það heppnaðist þó ekki fyrr en í þriðju tilraun árið 1937, með stofnun Flugfélags Akureyrar, sem markar upphaf samfellds atvinnuflugs á Íslandi.
Stofnun Flugfélags Akureyrar árið 1937, sem síðar varð Flugfélag Íslands, markar upphaf samfellds atvinnuflugs Íslendinga. Kaupin á 2ja hreyfla flugvél árið 1942, fyrsta millilandaflugið 1945, fyrstu skrúfuþoturnar 1957 og fyrstu þotukaupin 1967 voru meðal stærstu áfanga Flugfélagsins og flugsögu þjóðarinnar áður en félagið sameinaðist Loftleiðum með stofnun Flugleiða árið 1973, sem í dag er Icelandair.
Árið 1944 komu þrír ungir menn úr flugnámi með litla einshreyfils flugvél til landsins og stofnuðu Loftleiðir. Tveimur árum síðar voru þeir búnir að kaupa fjögurra hreyfla Skymaster-flugvél. Framhaldinu hefur verið lýst sem Loftleiðaævintýrinu, einu mesta viðskiptaævintýri Íslandssögunnar, en með sókn á alþjóðlegan flugmarkað náði félagið þriggja prósenta hlutdeild í farþegaflugi yfir Norður-Atlantshafið og lagði grunninn að umfangsmikilli ferðaþjónustu á Íslandi.
Flugstarfsemi skipar stærri sess á Íslandi en gerist meðal annarra þjóða og hefur byggt ferðaþjónustu upp sem þýðingarmesta atvinnuveg þjóðarinnar. Þúsundir Íslendinga hafa atvinnu af flugi, sem jafnframt tryggir landsmönnum greiðari flugsamgöngur við útlönd, austan hafs og vestan, en íbúar hinna Norðurlandanna búa við.
Áhöfn Boeing 747-þotu Air Atlanta í fraktflugi með lyfjafarm er fylgt frá Liege í Belgíu til Jóhannesarborgar í Suður-Afríku. Við kynnumst flugliðunum sem nýta hvíldarstopp í Kenýa til safaríferðar um þjóðgarð áður en flogið er áfram frá Nairobí með fulla flugvél af blómum afrískra bænda á markað Evrópu.
Við fjöllum um flugáhugann á Íslandi og kynnumst fólki sem valdi að gera flugið að sínum starfsvettvangi. Við spyrjum hversvegna Íslendingar urðu svo mikil flugþjóð sem raun ber vitni og hvað skýrir þann árangur sem íslenski fluggeirinn hefur náð á alþjóðlegum samkeppnismarkaði.
Fjallað er um alþjóðaútrás íslenskra flugfélaga, allt frá því Loftleiðir og Flugfélag Íslands hófu á árunum fyrir 1950 að nýta DC-4 flugvélar sínar til leiguverkefna víða um heim. Ameríkuflug Loftleiða markaði þáttaskil í sókn Íslendinga inn á alþjóðlegan samkeppnismarkað í áætlunarflugi. Í framhaldinu byggðist upp íslensk flugnýlenda í Lúxemborg sem vatt upp á sig með stofnun Cargolux. Flugfélag Guðna í Sunnu, Air Viking, varð fyrst íslenskra flugfélaga til að sinna pílagrímaflugi. Á grunni þess reis Arnarflug og síðar einnig Air Atlanta og Íslandsflug sem öll áttu eftir að verða umsvifamikil á alþjóðlegum leiguflugsmarkaði.
Boeing 757-þotan er sú farþegaflugvél sem lengst hefur þjónað Íslendingum í millilandaflugi. Hún er jafnframt eitt þýðingarmesta atvinnutæki þjóðarinnar sem sú flugvél sem flutt hefur flesta Íslendinga til útlanda og flesta ferðamenn til Íslands.
Airbus-þotur stefna í að verða burðarásinn í farþegaflugi til og frá Íslandi eftir að Icelandair valdi þær sem arftaka Boeing 757-vélanna. Íslendingar höfðu áður kynnst Airbus-þotum í þjónustu Wow Air og Play. Íslandsflug varð þó fyrst íslenskra flugfélaga til að reka þotur frá evrópska flugvélaframleiðandanum.
Íslensk flugnýlenda tók að byggjast upp í Lúxemborg um miðjan sjöunda áratuginn þegar hún varð lykilstöð Loftleiða í Norður-Atlantshafsfluginu. Þegar Loftleiðir svo stofnuðu Cargolux árið 1970 með heimamönnum og sænsku skipafélagi fjölgaði verulega þeim Íslendingum sem settust að í Lúxemborg til að starfa við flugið.
Cargolux í Lúxemborg, skilgreint afkvæmi Loftleiðaævintýrisins, telst stærsta fraktflugfélag Evrópu. Félagið er enn í dag einn af stærri vinnustöðum íslensks flugfólks.
Akureyrarflugvöllur er stærsti og mikilvægasti flugvöllur Íslands utan Suðvesturlands og stór vinnustaður flugtengdrar starfsemi. Fyrir opnun hans árið 1954 var Akureyrarflugi sinnt um Melgerðismela í Eyjafirði og á sjóflugvélum sem lentu á Pollinum. Stofnun Flugfélags Akureyrar árið 1937, forvera Icelandair, markaði upphaf samfellds atvinnuflugs á Íslandi.
Saga pílagrímaflugs Íslendinga rakin. Flugfólk sem starfað hefur við flutning pílagríma, bæði fyrr og nú, lýsir ævintýralegri reynslu á framandi slóðum.
Fjallað um litlu flugfélögin sem urðu snar þáttur í samgöngum landsbyggðarinnar áður en vegakerfið batnaði. Frumkvöðlar lýsa áskorunum.
Fjallað um flugvélarnar sem borið hafa uppi innanlandsflugið. Flugáhöfn fylgt í flugferð og fjallað um innanlandsflugið í fortíð, nútíð og framtíð.
Boeing 747-þotan í rekstri Íslendinga. Hún er kölluð drottning háloftanna og hefur lengi verið burðarás Atlanta-flugfélagsins.
Saga Grænlandsflugs Íslendinga rakin og þýðingu þess fyrir íslensk flugfélög. Áhöfn Isavia fylgt í flugprófunum um Grænland og sagt frá flugrekstri Grænlendinga og flugvallauppbyggingu landsins.
Við kynnumst starfsemi og sögu flugfélagsins Air Atlanta. Það rekur eingöngu breiðþotur, er með stærri fyrirtækjum Íslands en samt með nær allan sinn flugrekstur fjarri heimahögum.
Fjallað er um starfsemi Keflavíkurflugvallar, sem lýst er sem stóriðju. Við kynnumst fjölbreyttum störfum, sem mörgum er sinnt bak við tjöldin, fjarri augum flugfarþega.
