Ormhildur neitar að veiða múshveli í súpuna hans Alberts og Hallgrímur ákveður að reka þau á dyr. Til að komast hjá því leggur Albert af stað í hættulega skoffínveiðiferð. Ormhildur finnur slasað skoffín og kemst að því að hún er sú eina sem þolir banvænt augnaráð þess. Bilaði verndargripurinn hans Alberts gæti verið þeirra eina von.
Ormhildur sækir nykratað við Nykurvatn til að setja á eldinn. Óvart kemur lítið nykurfolald með henni heim. Litla skrímslið veldur uppnámi á eyjunni. Íbúarnir eru þjáðir af þorsta því Hallgrímur hefur sölsað undir sig allt vatnið. Hann bælir reiði þeirra með göldrum. Hann vill ekki að Albert noti galdra til að láta allt verða eins og það var fyrir flóðið.
Ormhildur, Albert og Guðrún leita að Týndu bókinni á Eyju safnarans. Þar rekast þau á Grétu, sem vann einu sinni með Alberti, og vill ná sér niðri á honum. Áform hennar koma í ljós þegar Álfur handsamar Albert. Guðrún og Ormhildur flýja með Týndu bókina í farteskinu.
Guðrún og Ormhildur uppgötva galdrahelli þar sem þær geta framið öflugan endurreisnargaldur. En það er bara mánuður til stefnu. Þegar Álfur og menn Hallgríms nálgast ræna þær Brynhildi sem flýgur með þær af stað. Albert sleppur naumlega úr háska þegar risastór haförn kemur honum til bjargar.
Flugvélin brotlendir og Ormhildur og félagar lenda í átökum við risastór skeldýr. Þau sleppa naumlega með því að flýja inn í dimma og óhugnanlega verksmiðju þar sem skeldýrin sjá ekkert. Hallgrímur er gerður að leiðtoga Breiðholtseyju og sendir Álf að sækja Týndu bókina og stöðva hetjurnar. Inni í verksmiðjunni finnur Ormhildur ískulda frá ósýnilegum krafti sem hvíslar: „DEYÐU“, og skugga með glóandi augu sem eltir þau.
Hallgrímur lærir að nota verndargrip Alberts. Brynhildur gerir við gamlan jeppa í verksmiðjunni. Kisi nær dularfullri flautu af ærslafullum púka. Ormhildur yfirbugar púkann og notar flautuna til að óska sér og hópnum í galdrahellinn. Smávegis mismæli senda þau í rangan helli. Álfur og önnur handbendi Hallgríms kljást við skeldýrin.
Hópurinn vaknar í dimmum helli. Þar er risatröllið Rauður með kindahjörð sína og hótar að breyta þeim í sauði nema þau geti leyst þrjár þrautir. Með heppni og klókindum tekst þeim að snúa vörn í sókn. Kindahjörðin ýtir Rauð fram af kletti og breytist aftur í fólk.
Hópurinn fær skjól hjá Hildi heilara. Ormhildur fer að leita jurta og lendir þá næstum í klóm Rauðs. Alberti tekst að flýja úr hafarnarhreiðrinu. Þrjár ástsjúkar skessur handsama hann, þvinga hann til að vinna og krefjast þess að hann giftist þeirri elstu. Álfur fellur í hendur Rauðs.
Hópurinn uppgötvar að ræningjar hafa látið greipar sópa um þorpið og fólkið sveltur. Brynhildur hvetur það til að berjast. Albert reynir að flýja en skessurnar breyta honum í fisk. Ormhildur og Guðrún halda að þær hafi fundið jeppa til að komast nær eldfjallaeyjunni Heklu en það reynist sjónhverfing. Loks ákveða nágrannaþorpin tvö að vinna saman í staðinn fyrir að berjast.
Guðrún kemst að því að vandræði þorpsins stafa af afkvæmum urðarkattar. Þorpsbúar safna kettlingunum saman og Ormhildur vill að þeim verði sleppt uppi í fjöllum. Á leiðinni mæta þau mannýgu nauti sem Guðrún ruglar rækilega í ríminu svo það lætur þau vera. Álfur fellst á vopnahlé við Rauð þegar hann kemst að því að þeir eiga sameiginlega andstæðinga í Ormhildi og hópnum hennar.
Urðarkettlingurinn sem Ormhildur bjargaði kemur aftur til hennar og vill ekki fara frá henni. Ormhildur fellur og rotast og þegar hún rankar við sér kemst hún naumlega undan Álfi og Rauð. Mamma urðarkettlinganna ræðst á þorpið en Ormhildur kemur á sáttum milli hennar og mannfólksins. Í þakklætisskyni ber hún Ormhildi og félaga hennar á bakinu að eyðilandinu.
Þyrstur og uppgefinn kemur hópurinn að vin í eyðimörkinni. Þau falla niður í kongungsríki nykranna. Eftir að hafa borðað matinn þeirra fara Brynhildur og Guðrún að tala á nykurtungu en Ormhildur virðist ónæm fyrir þessum göldrum. Hún fær óvænt hjálp frá agnarsmáu nátttrölli sem heitir Kubbur. Nykurkóngurinn vill að þau verði sendiherrar og fái íbúa Breiðholtseyju til að hætta að notfæra sér nykrana á eyjunni. Álfur, sem er orðinn skeggjaður, sér þau skjótast út úr vininni.
Teymið hennar Ormhildar hrekst inn í Hvískurklettana. Risavaxin nátttröll ná þeim og hóta að éta þau. Ormhildur kemst að því að tröllin heillast af henni, nema Sniffla sem er hroðalega kvefuð. Ormhildur dettur í poll og þá falla töfrarnir af henni svo tröllin ákveða að steikja allan hópinn. Að lokum nær Ormhildur aftur tökum á aðstæðum og sannfærir tröllin um að sleppa þeim. Álfur flýr með Týndu bókina.
Gjóla, drottning vindanna, magnar upp ofsaveður. Hópurinn tvístrast og skessurnar þrjár ná Ormhildi. Brynhildi, Guðrúnu og Kisa tekst að bjarga henni og flýja með Alberti sem enn er í líki fisks. Álfur heldur til Myrkheima en Hallgrímur heldur áfram í þyrlu til að eyðileggja Galdrahellinn. Albert losnar úr álögum og ljóstrar því upp að Ormhildur er dvergur.
Hópurinn leggur af stað að millivídda-galdrahliðinu í Galdrahellinum. Álfur neyðir þau inn í skóg hrafnakonungsins þar sem pínulítill Naddi ræðst á þau. Brynhildur lagfærir húsið hans og Guðrún stelur galdrakolum. Vakur tekur völdin á Breiðholtseyju og bilaður verndargripur sogar hættulega orku úr þeim Álfi og Vakri.
Ormhildur þrammar í burtu, reið við Albert yfir svikunum. Hrafnakonungurinn hneppir hin í álög sem skemmtikrafta. Endurbættur verndargripur Hallgríms sýnir honum Vakur sem er orðinn sólkonungur á Breiðholtseyju og stjórnar íbúunum. Álfur finnur veggteppi sem spáir fyrir um örlög Ormhildar og Guðrún nýtir töfra stolnu galdrakolanna. Förin verður sífellt hættulegri.
Hópurinn tekst á við Finngálkn og hittir ísbjarnakónginn Björn. Til að vinna upp tíma sem tapaðist í gildrunni í konungsríki nykranna smíða þau fleka til að komast yfir hafið að Heklu. Misheppnaður ljósagaldur Vakurs veldur fyndinni uppákomu á Árbæjareyju.
Þegar hópurinn mætir hafgýgjunum hefja þau upp raust sína til að verjast álögum. Tilraun Alberts með Töfraflautuna eftir Mozart mistekst. Ormhildur bjargar öllu með því að syngja um sætu öndina sína, Alberti til lítillar gleði. Hallgrímur fylgist með Vakri í gegnum verndargripinn á leiðinni að Galdrahellinum. Álfur vaknar í bústað Björns.
Óveður og árásir Kraka eyðileggja flekann. Gústi skrímslaveiðimaður bjargar hópnum en hann hefur illt í hyggju. Hann notar þau sem beitu til að veiða Kraka. Ormhildur vingast við Kraka og bjargar honum úr gildru Gústa. Álfur slítur tengslin við Hallgrím með aðstoð Björns.
Álfur hefur loks fundið innri frið með aðstoð Björns. Friðurinn snýst fljótt upp í reiði og hann stefnir að Heklu. Ormhildur og vinir hennar festast í óheppnisbelti og bjarga fjörulalla með töfrum Ormhildar. Hallgrímur tapar völdum og handbendi hans yfirgefa hann.
Hópurinn klífur upp að Galdrahellinum og lendir í óvæntri hættu. Kisi finnur skoffínahjörð og Ormhildi tekst að róa árásargjörn naut. Hallgrímur, sem veit ekki að þau eru í nánd, heldur áfram í átt að hellinum. Kisi sameinast hópnum á ný og Ormhildur fer með þau yfir stórbrotið landslag.
Inni í Galdrahellinum er stöpull þakinn rúnaletri sem segir þeim að játa en það er sama hvað þau játa, ekkert dugar gegn draugalegum galdramönnum og gullbjöllunum þeirra. Hópurinn tvístrast og þau velta fyrir sér hvað þau eru að gera þarna. Álfur og Hallgrímur mætast fyrir utan hellinn. Þegar Álfur stígur inn í hellinn bregst galdramátturinn honum og inngangurinn fellur saman. Þeir eru innilokaðir.
Hópurinn endar í stórum fimmhyrndum sal. Galdrar Alberts og Guðrúnar fara úrskeiðis. Álfur og Hallgrímur birtast og þau sogast öll inn í ormagöng þar sem tíminn er brenglaður. Inn í göngunum býr draugur galdramanns sem fleygir Ormhildi, Kisa og Álfi út. Þau komast í þyrluna, sem lið Hallgríms hefur gert við, og fljúga heim á Breiðholtseyju.
Millivíddargaldrahliðið spýtir Hallgrími, Alberti, Brynhildi og Guðrúnu upp á sker á milli eyjanna tveggja. Lið Hallgríms bjargar honum og hann handtekur Albert. Guðrún kemur úr göngunum spillt af svartagaldri. Svart frost breiðist út í kringum hana þegar hún fer að Hallgrímkirkjuturni. Ormhildur, Álfur og Kisi snúa aftur til Breiðholtseyju í þyrlu. Haförninn bjargar þyrlunni. Í fjarska sjá þau Guðrúnu verða altekna af myrkri.
Í álögum Guðrúnar gleypir Rauðkembingur Ormhildi, Álf og Kisa. Þau festast í maga ormsins ásamt pínulitlum Nadda. Hallgrímur tekur aftur völdin á Breiðholtseyju og fer fyrir vonlausri árás á ormana.
Orrustan við sæormana geisar. Glötuð sál Guðrúnar kvelur hana og Ormhildur berst við að sameina hópinn. Guðrún ætlar að frysta allt og alla. Ormhildur og allir vinir hennar, nær og fjær, stöðva Guðrúnu með göldrum svo illa orkan yfirgefur hana. Albert og Ormhildur bjóða vinum, vandamönnum og skepnum að vera með í að stofna (SVGKV) SAMTÖK VINA GALDRAKINDA OG VERA og boða nýtt upphaf fyrir alla.